ഓണം

 ഓണം പലകുറി വന്നുപോയി

ഓണത്തിന്നോർമ്മ പലതുമായി 

ഓണക്കളികളും പാട്ടുമായി

ഓർമ്മപ്പെരുമകൾ കാതിലെത്തി 

ഓണങ്ങൾ പിന്നെയും വന്നുപോകെ

ഓണത്തിനാഹ്ലാദം പങ്കുവച്ചോർ

ഓർമ്മതന്നോളപ്പരപ്പുകളി-

ലോരോന്നായെങ്ങോകൊഴിഞ്ഞു വീണു 

ഓണപ്പഴമകൾ പാടിപ്പാടി

ഓർമ്മകളോരോന്നായവിറക്കി 

ഓരോ പഴമക്കാരൊത്തുകൂടി 

ഓണപ്പഴമയിലഭിരമിപ്പൂ  

ഓണപ്പുതുമകളേറ്റു വാങ്ങി

ഓണം പുതുമക്കാർ തോളിലേറ്റി

ഓണം പുതുക്കിമിനുക്കിടുന്നോർ

ഓണത്തിൻ നേരവകാശികളായ് 

ഓണമീണ്ണിൽ നിറഞ്ഞു നിൽക്കും

ഓരോരോ കാലഗതികൾ പോലെ

ഓണപ്പഴമ പഴമതന്നെ

ഓണപ്പുതുമകളോണമായി

ഓണമിന്നോരോമനസ്സിലുമ

ങ്ങാഘോഷപ്പെരുമ്പറ കൊട്ടിടട്ടെ.

അമ്മയോണം

 ഓണമെന്നോർമ്മയിലമ്മയായീ

മുന്നിൽനിറഞ്ഞു ചിരിച്ചുനിൽപ്പൂ

നഷ്ടവസന്തങ്ങൾ ഓണച്ചിറകേറി

ഇഷ്ടസ്വപ്‌നങ്ങളായ്‌ വന്നണഞ്ഞൂ

ഏഴുന്നിലകളിൽ മാലചാർത്തി

ഏഴുതിരിയിട്ടലങ്കരിച്ച

ഉത്രാടപ്പൊൻവിളക്കിന്നഴകിൽ

അമ്മതൻ സ്നേഹം തിരികൊളുത്തീ

മുറ്റത്തെപ്പൂക്കളം വാരിവിതറിയ ചന്തപ്പൊലിമയായമ്മനിന്നൂ.

ഊഞ്ഞാലിലാടുന്നപാട്ടിന്റെ ഈരടി

ഈണമായമ്മ ഹരം പകർന്നൂ

തൂശനിലയിൽവിളമ്പിവച്ച

കറികളിൽ നിറവും മണവുമായീ

രുചിപകർന്നമ്മ നിരന്നിരുന്നൂ

ഓർമ്മയിലോണമായമ്മണിന്നൂ

ഓണക്കളികളിൽതുള്ളിത്തുളുമ്പുമൊ -

രുത്സാഹമായെന്റെയമ്മനിന്നൂ.

വല്ലായ്മയെങ്ങോഒതുക്കിവച്ചി -

ട്ടാഹ്ലാദമാർക്കും പകർന്നു നല്കീ

ഓണമിങ്ങോർമ്മയായമ്മനിന്നൂ.

ഓണമിങ്ങോർമ്മയായമ്മനിന്നൂ.